នាព្រឹកថ្ងៃសុក្រ ៤រោច ខែកត្តិក ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី ០១ ខែធ្នូ ឆ្នាំ២០២៣ នៅសាលប្រជុំអគ្គលេខាធិការដ្ឋាន អាជ្ញាធរទន្លេសាប ឯកឧត្តម ហ៊ែល តូនី អនុប្រធានក្តាប់រួម អាជ្ញាធរទន្លេសាប តំណាងដ៏ខ្ពង់ខ្ពស់ឯកឧត្តមរដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានទទួលជួបពិភាក្សាការងារជាមួយគណៈប្រតិភូមេគង្គ-ឡានឆាង ដែលដឹកនាំដោយ លោក Li Ge អគ្គនាយករង ក្រសួងធនធានទឹក នៃសាធារណរដ្ឋប្រជាមានិតចិន និង Dr. Zhou Zhiwei, អគ្គលេខាធិការ មជ្ឈមណ្ឌលកិច្ចសហប្រតិបត្តិការធនធានទឹកឡានឆាង-មេគង្គ (LMC) ។
សូមជម្រាបថា កិច្ចប្រជុំនេះ មានការចូលរួមពីឯកឧត្តមអគ្គលេខាធិការ ប្រធាននាយកដ្ឋាននីតិកម្ម និងផ្សព្វផ្សាយ អនុប្រធាននាយកដ្ឋានធនធានធម្មជាតិ មន្ត្រីបច្ចេកទេស នៃអាជ្ញាធរទន្លេសាប ព្រមទាំងមន្ត្រីបច្ចេកទេសនៃក្រសួងធនធានទឹកចិន និងមេគង្គ-ឡានឆាង។
ក្នុងឱកាសជំនួបនេះដែរ ឯកឧត្តម អនុប្រធាន បានជម្រាបជូនគណៈប្រតិភូ អំពីតួនាទី ភារកិច្ច បេសកកម្មស្នូល និងសមិទ្ធផលស្នាដៃដែលអាជ្ញាធរទន្លេសាបសម្រេចបានកន្លងមក ព្រមទាំងបានបង្ហាញពីទស្សនទានការងារដែលកំណត់នៅក្នុងផែនការយុទ្ធសាស្ត្ររបស់អាជ្ញាធរទន្លេសាប ២០២៤-២០២៨ ផ្សាភ្ជាប់នឹងបញ្ហាប្រឈម និងវិធានការទប់ស្កាត់ផលប៉ះពាល់មកលើបឹងទន្លេសាបនាពេលបច្ចុប្បន្ន និងទៅអនាគត រួមជាមួយការលើកឡើងភាពទំនាក់ទំនងរវាងបឹងទន្លេសាប ជាមួយទន្លេមេគង្គ ។
ជាមួយនេះដែរ ប្រធានគណៈប្រតិភូ រួមជាមួយក្រុមប្រតិភូ ឡានឆាង-មេគង្គ បានចាប់អារម្មណ៍យ៉ាងខ្លាំង ជាមួយការលើកឡើងពាក់ព័ន្ធនឹងទស្សនទានការងាររបស់អាជ្ញាធរទន្លេសាបផ្សាភ្ជាប់នឹងបញ្ហាបឹងទន្លេសាប និងភាពទំនាក់ទំនងរវាងបឹងទន្លេសាប ជាមួយទន្លេមេគង្គ ។
ជាលទ្ធផលនៃកិច្ចពិភាក្សា គណៈប្រតិភូឡានឆាង-មេគង្គ លោក Li Ge និង Dr. Zhou Zhiwei, បានទទួលយកនូវសំណើរបស់ ឯកឧត្តមអនុប្រធានអាជ្ញាធរទន្លេសាប ក្នុងការពង្រឹងចំណងមិត្តភាព និងកិច្ចសហប្រតិបត្តិការយូរអង្វែងរវាង អាជ្ញាធរទន្លេសាប និងឡានឆាង-មេគង្គ ហើយនឹងចាត់តាំងមន្ត្រីបច្ចេកទេស ០១រូប ដើម្បីសហការជួយរៀបចំសំណើគម្រោង Project Proposal កិច្ចសហប្រតិបត្តិការរវាង អាជ្ញាធរទន្លេសាប និង Lancang-Mekong Water Resources Cooperation-LMC នាពេលខាងមុខ ។