នាថ្ងៃទី ២១ - ២២ ខែកញ្ញា ឆ្នាំ ២០១៥ លោក យ៉ាន់ សំរិទ្ធ ប្រធាននាយកដ្ឋាននីតិកម្ម និងផ្សព្វផ្សាយ នៃអាជ្ញាធរទន្លេសាប បានចូលរួមសិក្ខាសាលាពិគ្រោះយោបល់ ស្តីពីច្បាប់ទឹកអន្តរជាតិ និងកិច្ចសហ ប្រតិបត្តិការតំបន់ ដែលរៀបចំឡើងដោយគណៈកម្មាធិការជាតិទន្លេមេគង្គកម្ពុជា សហការជាមួយអង្គការអន្តរជាតិ IUCN នៅសណ្ឋាគារកាំបូឌីយ៉ាណា រាជធានីភ្នំពេញ ក្រោមអធិបតីភាពឯកឧត្តម តែ ណាវុធ អគ្គលេខាធិការ គណៈកម្មការជាតិទន្លេមេគង្គកម្ពុជា ព្រមទាំងមានការចូលរួមពីមន្ត្រីតំណាងក្រសួង-ស្ថាប័នជាតិ និងមន្ត្រី IUCN សរុប ចំនួន 30 រូប។ សិក្ខាសាលានេះរៀបចំឡើងក្នុងគោលបំណង (១) ផ្សព្វផ្សាយជូននូវឯកសារស្តីពីការចូលជាធរមាននៃអនុសញ្ញាអង្គការសហប្រជាជាតិស្តីពីប្រភពទឹកឆ្នាំ១៩៩៧ ( UN Watercourses Convention ), (២) ពិភាក្សាលើខ្លឹមសារនៃឯកសារជាជំនួយដល់អភិបាលកិច្ចទឹកក្នុងអាងទន្លេមេគង្គ ( ការវិភាគទិដ្ឋភាពច្បាប់ក្នុងអនុសញ្ញានេះ សម្រាប់អនុវត្តបន្ថែមលើកិច្ចព្រមព្រៀងមេគង្គឆ្នាំ ១៩៩៥ ដើម្បីជួយធ្វើឲ្យប្រសើរឡើងនូវការគ្រប់គ្រងទឹកឆ្លងដែនក្នុងអាងទន្លេមេគង្គ ) ។
ជាលទ្ធផលសិក្ខាកាម បានយល់ជ្រួតជ្រាបពីអនុសញ្ញាអង្គការសហប្រជាជាតិ ឆ្នាំ 1997 មានតម្លៃបំពេញបន្ថែមចំពោះកិច្ចព្រមព្រៀងមេគង្គឆ្នាំ1995 សម្រាប់ការអភិវឌ្ឍន៍ដើម្បីធានាបាននូវកិច្ចសហ ប្រតិបត្តិការល្អ ការប្រើប្រាស់ធនធានធម្មជាតិប្រកបដោយសមធម៌និងចីរភាព ព្រមទាំងបង្ការផលប៉ះ ពាល់អាក្រក់និងការពារបរិស្ថានធម្មជាតិក្នុងអាងទន្លេមេគង្គ។