ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប អញ្ជើញចូលរួមក្នុងវេទិកាសាធារណៈនៅ ខេត្តបន្ទាយមានជ័យ
នាថ្ងៃទី ២៥ ខែកញ្ញា ឆ្នាំ២០១៥ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប និងជាសមាជិកក្រុមការងារថ្នាក់ជាតិចុះមូលដ្ឋានខេត្តបន្ទាយមានជ័យ បានអញ្ជើញចូលរួមកម្មវិធីវេទិកាសាធារណៈនៅភូមិឃីឡិក ឃុំបន្ទាយនាង ស្រុកមង្គលបូរី ខេត្តបន្ទាយមានជ័យ ក្រោមអធិបតីភាពឯកឧត្តម វង់ សណ្តាប់ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអនុប្រធានក្រុមការងារថ្នាក់ខេត្តចុះមូលដ្ឋានស្រុកមង្គលបូរី។ កម្មវិធីនៃវេទិកាសាធារណៈនេះ ធ្វើឡើងដោយបានផ្សារភ្ជាប់នឹងកម្មវិធីគម្រោងឧបត្ថម្ភស្បៀងបន្ទាន់របស់ក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពីសមាជិកសមាជិកានៃក្រុមការងារថ្នាក់ជាតិ អភិបាលរងខេត្ត អភិបាលរងស្រុក ក្រុមប្រឹក្សា អាជ្ញាធរមូលដ្ឋានភូមិ ឃុំ តំណាងសហគមន៍កសិករគំរូ សហគមន៍អ្នកប្រើប្រាស់ទឹក សហគមន៍ក្រុមសន្សំប្រាក់ និងប្រជាពលរដ្ឋជាច្រើនរូប។ ឯកឧត្តម ប្រធានអង្គប្រជុំ បានបង្ហាញជូនអំពីដំណើរការនៃគម្រោង និងផែនការសកម្មភាពដែលត្រូវអនុវត្តបន្ត និងស្តាប់នូវសំណូមពររបស់ប្រជាកសិករព្រមទាំងបានចូលរួមថវិកាបដិភាគក្នុងការស្នើសុំស្តារប្រឡាយប្រវែង ១,៥០០ម៉ែត្រ ដែល មានទីតាំងស្ថិតនៅក្នុងឃុំបន្ទាយនាង។
