នាថ្ងៃទី ១៨ ខែមីនា ឆ្នាំ ២០១៦ ឯកឧត្តម ហ៊ែល តូនី អគ្គលេខាធិការ អាជ្ញាធរទន្លេសាប បានអញ្ជើញចូលរួមកិច្ចប្រជុំសន្ទនាជាមួយដៃគូអភិវឌ្ឍន៍ ស្តីពី ការប្រែប្រួលអាកាសធាតុ និងផែនការបន្សាំថ្នាក់សហគមន៍ នៅសណ្ឋាគារ អប្សារាអង្គរ ខេត្តសៀមរាប ក្រោមការសម្របសម្រួល និងដឹកនាំដោយ វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ក្រោមហិរញ្ញវត្ថុពី IDRC នៃប្រទេសកាណាដា ។ កិច្ចប្រជុំសន្ទនានេះ ផ្អែកលើលទ្ធផលកិច្ចសិក្សាស្រាវជ្រាវគម្រោងបន្សាំការប្រែប្រួលអាកាសធាតុ និងអភិបាលកិច្ចធនធានទឹកនៅកម្ពុជា ដែលសិក្សានៅអាងទន្លេសាប និងការចុះទស្សនៈកិច្ចសិក្សា បណ្តុះបណ្តាលថ្នាក់សហគមន៍ ។
គោលបំណងនៃកិច្ចប្រជុំនេះ គឺ ៖
- ចែករំលែកគម្រោងស្នើសុំ និងផែនការបន្សាំទៅនឹងការប្រែប្រួលអាកាសធាតុរបស់សហគមន៍ និងសំណើស្រាវជ្រាវនៃអាងរងទឹកភ្លៀងស្ទឹងចំនួន ៣ (ស្ទឹងជ្រៃបាក់ ស្ទឹងពោធិ៍សាត់ និងស្ទឹងជីនិត) រួមជាមួយនិងការចូលរួមគំនិតទូលំទូលាយពីបណ្តាក្រសួង ស្ថាប័នពាក់ព័ន្ធទាំងកម្រិតថ្នាក់ជាតិ និងថ្នាក់ក្រោមជាតិ
- សម្របសម្រួលឲ្យមានការចូលរួម និងពង្រឹងភាពជាដៃគូជាមួយនឹងអ្នកបង្កើតគោលនយោបាយ និងដៃគូអភិវឌ្ឍន៍ ក្នុងការដាក់បញ្ចូលគោលនយោបាយការប្រែប្រួលអាកាសធាតុ ទៅក្នុងយុទ្ធសាស្ត្រ និងការអភិវឌ្ឍន ។