កិច្ចប្រជុំការងាររៀបចំផលិតរបាយការណ៍ស្តីពីស្ថានភាពអាងទន្លេសាប លើកទី១
នាព្រឹកថ្ងៃចន្ទ ១២រោច ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០១ ខែមេ៣សា ឆ្នាំ២០១៩ នៅសាលប្រជុំអាជ្ញាធរទន្លេសាប ឯកឧត្តម ហ៊ែល តូនី អនុប្រធាន អាជ្ញាធរទន្លេសាប និងជាប្រធានក្រុមការងារបច្ចេកទេស បានដឹកនាំកិច្ចប្រជុំលើកដំបូងជាមួយក្រុមការងារបច្ចេកទេសក្រោមឱវាទអាជ្ញាធរទន្លេសាប ដើម្បីដំណើរការរៀបចំផលិតរបាយការណ៍ ស្តីពីស្ថានភាពអាងបឹងទន្លេសាប Status of TSL Basin Report ។ កិច្ចប្រជុំបានពិភាក្សាទៅទិដ្ឋភាពរួមនៃខ្លឹមសារឯកសារទស្សនៈទានផ្តួចផ្តើមដំបូងទាំងគោលបំណង លទ្ធផលសម្រេច ធាតុចេញ ធាតុចូល និងដំណាក់កាលនៃការរៀបចំរបាយការណ៍នេះរហូតដល់ទទួលបានការអនុម័តប្រើប្រាស់ជាផ្លូវការ ក្នុងការគាំទ្រដល់ការរៀបចំនូវគោលនយោបាយ យុទ្ធសាស្ត្រ ឬគម្រោងកម្មវិធីផ្សេងៗ រួមជាមួយការផ្សព្វផ្សាយចែករំលែកការយល់ដឹងជាសាធារណៈ ជម្រុញអោយមានការចូលរួមអនុវត្តគោលនយោបាយរបស់រាជរដ្ឋភិបាល រក្សាបាននូវតុល្យភាពរវាងការអភិវឌ្ឍ និងការអភិរក្សប្រកបដោយចិរភាព ។ ការពិភាក្សាបានផ្តោតសំខាន់ទៅសូចនាករសំខាន់តាមផ្នែកសេដ្ឋកិច្ច សង្គមកិច្ច ធនធានធម្មជាតិ បរិស្ថាន បម្រែបម្រួលអាកាសធាតុ រួមជាមួយបទដ្ឋានគតិយុត្ត គោលនយោបាយនានា ធ្វើយ៉ាងណាអោយរបាយការណ៍នេះជាឯកសារគោលមានលក្ខណៈជាវិទ្យាសាស្ត្រឆ្លុះបញ្ចាំងពីអតីតកាល បច្ចុប្បន្ន និងដំណោះស្រាយ ។
