លោក ប៉ុន វុឌ្ឍី អនុប្រធាននាយកដ្ឋាន និងក្រុមការងារ នៃនាយកដ្ឋានធនធានធម្មជាតិ បានបន្តចុះធ្វើបច្ចុប្បន្នភាពធនធានជលផលតាមការប្រែប្រួលរបបជលសាស្ត្រ និងវាយតម្លៃគុណភាពទឹកបឹងទន្លេសាប នៅខេត្តសៀមរាប និងខេត្តបាត់ដំបង
នាថ្ងៃចន្ទ ១០រោច ខែភទ្របទ ដល់ ថ្ងៃសុក្រ ១៤រោច ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី ៩ ដល់ ១៣ ខែ តុលា ឆ្នាំ២០២៣ ក្រុមការងារមន្ត្រីនាយកដ្ឋានធនធានធម្មជាតិ ដឹកនាំដោយលោក ប៉ុន វុឌ្ឍី អនុប្រធាននាយកដ្ឋាន បានបន្តចុះធ្វើបច្ចុប្បន្នភាពធនធានជលផលតាមការប្រែប្រួលរបបជលសាស្ត្រ និងវាយតម្លៃគុណភាពទឹកបឹងទន្លេសាបនៅក្នុងភូមិសាស្ត្រ តំបន់កំពង់ឃ្លាំង និងតំបន់ចុងឃ្នៀស ខេត្តសៀមរាប និងតំបន់ព្រែកទាល់ ខេត្តបាត់ដំបង។
ការចុះសិក្សានេះ ក្រុមការងារបានធ្វើលើ ៖
ទី១. សម្ភាសន៍ប្រជានេសាទ ដើម្បីប្រមូលទិន្នន័យ-ព័ត៌មានពីការប្រើប្រាស់ប្រភេទឧបករណ៍នេសាទនៅតំបន់សិក្សា ។
ទី២. ប្រមូលសំណាកត្រី និងធនធានក្រៅពីត្រី, ទីតាំងនេសាទ (X,Y), វាស់ជម្រៅទឹកក្នុងតំបន់នេសាទនីមួយៗ, វាស់គុណភាពទឹកបឋម និងពិនិត្យលើលំនៅដ្ឋានធនធានត្រីនៅរដូវវស្សា ។
ជាមួយនឹងសកម្មភាពសិក្សានៅតំបន់ខាងលើ និងតំបន់ពាក់ព័ន្ធ ជាលទ្ធផលបឋមបង្ហាញឃើញថា ៖
១. បានរកឃើញប្រភេទត្រីចំនួន ៣០ ប្រភេទ ដោយប្រើប្រាស់នូវឧបករណ៍ការនេសាទ ៣ ប្រភេទ គឺឧបករណ៍ មងរាយ បរ និងសន្ទូច ។
២. បានវាស់ ថ្លឹង និងកត់ត្រាលើប្រភេទវារីសត្វ/សិប្បីសត្វសរុបមានចំនួន ០៤ ពួកធំៗ ដោយចែកចេញជា ០៤ ថ្នាក់ ស្មើនឹង ០៥ លំដាប់ និង ០៨ អម្បូរ មាន ១៧ ប្រភេទ។ ក្នុងនោះវារីសត្វដូចជា (កំពឹស ពស់ទឹក) មានចំនួន ០៣ អម្បូរ ស្មើនឹង ០៦ ប្រភេទ និងសិប្បីសត្វដូចជា (លៀស ខ្យង ខ្ចៅ គ្រំ) មានចំនួន ០២ អម្បូរ ស្មើនឹង ១១ ប្រភេទ។
៣. គុណភាពទឹកបឹងទន្លេសាបនារដូវវស្សា នាពាក់កណ្តាលខែតុលា គឺជាទឹកដែលមានគុណភាពល្អសម្រាប់ធនធានជលផលគ្រប់ប្រភេទរស់នៅ លាក់ខ្លួន និងលូតលាស់ធំធាត់ ដោយទឹកមានភាពថ្លាចាប់ពី ១៥ ស.ម ទៅ ២០ ស.ម ស៊ីតុណ្ហភាពទឹកមានចន្លោះពី ៣០ ទៅ ៣១ អង្សារoC ចំណែកអុកស៊ីសែនរលាយក្នុងទឹកមានគ្រប់គ្រាន់លើសពី ៣ mgO2/L ។
សូមជម្រាបជូនថា៖ សកម្មភាពចុះធ្វើបច្ចុប្បន្នភាពធនធានជលផលតាមការប្រែប្រួលរបបជលសាស្ត្រ និងវាយតម្លៃគុណភាពទឹកបឹងទន្លេសាបនៅភូមិសាស្ត្រ ក្នុងខេត្តសៀមរាប និងខេត្តបាត់ដំបង គឺជាសកម្មភាពមួយក្នុងចំណោមសកម្មភាពសំខាន់ៗជាច្រើន ដែលត្រូវបានអនុម័តឱ្យអនុវត្តន៍នៅក្នុងផែនការសកម្មភាពប្រចាំឆ្នាំ២០២៣ របស់នាយកដ្ឋានធនធានធម្មជាតិ នៃអាជ្ញាធរទន្លេសាប
សកម្មភាពខាងលើនេះ មានគោលបំណងដើម្បី៖
- តាមដាន និងវាយតម្លៃប្រភេទធនធានជលផលទៅតាមប្រភេទឧបករណ៍
- តាមដាន និងវាយតម្លៃគុណភាពទឹកបឹងទន្លេសាបទៅតាមទីតាំងសិក្សា។
- តាមដានលើលក្ខណៈជីវសាស្ត្ររបស់ត្រី លៀស និងគ្រុំ លើការរស់នៅ ការបន្តពូជ និងការលូតលាស់ (រដូវប្រាំង/រដូវវស្សា)។
