ការអញ្ជើញចូលរួមរបស់ថ្នាក់ដឹកនាំអាជ្ញាធរទន្លេសាប ក្នុងសន្និសីទថ្នាក់តំបន់អាស៊ីអាគ្នេយ៍
កាលពីថ្ងៃទី 25-26 ខែមីនា ឆ្នាំ 2014 ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប បានអញ្ជើញចូលរួមសន្និសីទថ្នាក់តំបន់អាស៊ីអាគ្នេយ៍ ក្រោមប្រធានបទ “ ការអភិវឌ្ឍបៃតង ” ក្រោមអធិបតីភាព ឯកឧត្តម យិន គឹមស៊ាន រដ្ឋលេខាធិការ ក្រសួងបរិស្ថាន ដែលរៀបចំដោយ NGO Forum, CAFOD, AsiaNGO, និង Green Inclusive Growth ក្នុងគោលបំណងផ្សព្វផ្សាយនូវកម្មវិធីអភិវឌ្ឍបៃតងក្នុងតំបន់អាស៊ីអាគ្នេយ៍ និងសម្របសម្រួលដល់ការលើកទឹកចិត្តចំពោះស្ថាប័នពាក់ព័ន្ធ ដើម្បីចូលរួមសហការក្នុងការលើកកម្ពស់នូវ កម្មវិធីអភិវឌ្ឍបៃតងនាពេលអនាគត។
សន្និសីទ មានការចូលរួមពីតំណាងរដ្ឋាភិបាល អ្នករៀបចំគោលនយោបាយអង្គការជាតិ អន្តរជាតិ និងវិស័យឯកជន ដែលមកពីបណ្តាប្រទេសក្នុងតំបន់អាស៊ីអាគ្នេយ៍ ដើម្បីចូលរួមនូវគំនិត និងយោបល់ក្នុងការកំណត់នូវការអនុវត្តការអភិវឌ្ឍបៃតងឲ្យទទួលបាននូវផលប្រយោជន៍ដល់បរិស្ថាន សេដ្ឋកិច្ច និងសង្គម ជាពិសេស ការលើកបង្ហាញអំពីរាល់កម្មវិធីថ្នាក់ជាតិតាមបណ្តាប្រទេសនីមួយៗនៅក្នុងតំបន់ និងបង្ហាញអំពីផែនទីបង្ហាញផ្លូវនៃការអភិវឌ្ឍបៃតង (Green Growth Roadmap) ។
