ឯកឧត្តម ជា សុខនី បានដឹកនាំក្រុមការងារបច្ចេកទេស ចុះធ្វើការរុះរើស្ថានីយជលសាស្ត្រ និងឧតុនិយមបាក់ត្រកួន
ដោយមានការអនុញ្ញាតពីថ្នាក់ដឹកនាំអាជ្ញាធរទន្លេសាប នាព្រឹកថ្ងៃសុក្រ ៦កើត ខែពិសាខ ឆ្នាំម្សាញ់ សប្តស័ក ពុទ្ធសករាជ ២៥៦៨ ត្រូវនឹងថ្ងៃទី០២ ខែឧសភា ឆ្នាំ២០២៥ ឯកឧត្តម ជា សុខនី អគ្គលេខាធិការរងអាជ្ញាធរទន្លេសាប និងជាប្រធានក្រុមការងារទទួលបន្ទុកអនុវត្តន៍គម្រោងក្រោមកិច្ចសហប្រតិបត្តិការជាមួយសាធារណរដ្ឋប្រជាមានិតចិន បានដឹកនាំក្រុមការងារបច្ចេកទេស ចុះធ្វើការរុះរើស្ថានីយជលសាស្ត្រ និងឧតុនិយមបាក់ត្រកួនចេញ ដែលមានទីតាំងស្ថិតនៅចំណុចក្បាលស្ពានខាងកើត ក្នុងភូមិបោះពួយ ឃុំលាច ស្រុកភ្នំក្រវ៉ាញ ខេត្តពោធិ៍សាត់។ សូមជម្រាបជូនថា ទីតាំងស្ថានីយជលសាស្ត្រ និងឧតុនិយមបាក់ត្រកួន ដែលត្រូវរុះរើនេះជាទីតាំងត្រូវសាងសង់ស្ពានបេតុងថ្មី ដែលជាអំណោយដ៏ថ្លៃថ្លាបំផុតរបស់សម្ដេចមហាបវរធិបតីនាយករដ្ឋមន្ត្រី ជំនួសស្ពានចាស់ដែលមានសភាពទ្រុឌទ្រោម។ ក្រុមការងារបានបន្តចុះធ្វើការសិក្សា ដើម្បីដំឡើងស្ថានីយនេះនៅលើទីតាំងផ្សេង៕
