នាព្រឹកថ្ងៃទី ១៦ ខែតុលា ឆ្នាំ២០១៤ នេះ ឯកឧត្តម ខូវ មាស អគ្គលេខាធិការរង អាជ្ញាធរទន្លេសាប បានអញ្ជើញចូលរួមកិច្ចប្រជុំអន្តរក្រសួងនៅទីស្តីការគណៈរដ្ឋមន្ត្រី ដើម្បីពិភាក្សាលើសេចក្តីព្រាងព្រះរាជក្រឹត្យ ស្តីពីការកែសម្រួលមាត្រា ៤ មាត្រា ៥ និងមាត្រា ៧ នៃព្រះរាជក្រឹត្យលេខ នស/រកត/០៣០៣/១១៦ ចុះថ្ងៃទី ១១ ខែមីនា ឆ្នាំ ២០០៣ ស្តីពីការកំណត់រមណីយដ្ឋានសំបូរព្រៃគុក ក្រោមអធិបតីភាព ឯកឧត្តម សយ សុខា អគ្គលេខាធិការរាជរដ្ឋាភិបាល និងដោយមានការអញ្ជើញចូលពីតំណាងក្រសួង ស្ថាប័នជំនាញពាក់ព័ន្ធនានា ។
កិច្ចប្រជុំនេះ រៀបចំទ្បើងដោយគោរពតាមបទបញ្ជាលេខ ០៥ ប.ប ចុះថ្ងៃទី ៣១ ខែតុលា ឆ្នាំ២០១៣ ស្តីពីការអនុវត្តន៍ព្រះរាជក្រឹត្យ និងអនុក្រឹត្យ ផ្ទេរ និងសមាហរណកម្មការងាររបស់ស្ថាប័នរដ្ឋមួយចំនួន។ ចាប់ពីឆ្នាំ ២០១១ មក រហូតមកដល់ពេលនេះ ក្រសួងវប្បធម៌ និងវិចិត្រសិល្បៈបានរៀបចំក្រុមការងារស្រាវជ្រាវមួយ ដោយសហការជាមួយនាយកដ្ឋានភូមិសាស្ត្រនៃក្រសួងរៀបចំដែនដី នគរូបនីយកម្ម និងសំណង់ សាកលវិទ្យាល័យវ៉ាសេដានៃប្រទេសជប៉ុន ហើយនិងអ្នកជំនាញការបរទេសខាងបេតិកភណ្ឌ ដែលបានស្ម័គ្រចិត្តស្រាវជ្រាវ និងចងក្រងឯកសារពីប្រាសាទសំបូរព្រៃគុក តាមគោលការណ៍ណែនាំរបស់គណៈកម្មាធិការបេតិកភណ្ឌពិភពលោក ដើម្បីដាក់ស្នើសុំបញ្ចូលជាផ្លូវការក្នុងបញ្ជីបេតិកភណ្ឌពិភពលោក ឲ្យបានមុនថ្ងៃទី ៣១ ខែមករា ឆ្នាំ ២០១៥ ។
អង្គប្រជុំបានពិភាក្សាយ៉ាងល្អិតល្អន់ អំពីការរៀបចំ និងផលវិបាកផ្សេងៗដែលអាចនឹងកើតមានឡើងក្រោយពេលដែលព្រះរាជក្រឹត្យនេះចេញជាស្ថាពរ។ ជាលទ្ធផលកិច្ចប្រជុំពិភាក្សា បានពិនិត្យ កែសម្រួលនូវពាក្យពេជន៍ ឃ្លាប្រយោគ ខ្លឹមសារ និងទំរង់ការនៃព្រះរាជក្រឹត្យ ដើម្បីឲ្យមានភាពល្អប្រសើរ និងស្របតាមបទដ្ឋាននៃច្បាប់។ ឯកឧត្តម ប្រធានអង្គប្រជុំបានឯកភាព និងទុករយៈពេលមួយ ថ្ងៃដើម្បីឲ្យក្រុមការងារបច្ចេកទេសអន្តរក្រសួង ធ្វើការជាមួយគ្នា ដើម្បីផ្ទៀងផ្ទាត់ទៅលើនិយាមកា នៃមាត្រា ៤ ថ្មី ដែលចែងពី តំបន់ស្នូល តំបន់ទ្រនាប់ និងតំបន់រណប ឲ្យបានច្បាស់លាស់។